Укх шерара декхараш кхоачашде аьттув баьлар наькъий гӀулакхех йолча Министерствон
Укх шера кхоачашъяьча «Кхераме доаца дика наькъаш» яхача проектага гӀолла 28 км кхоачаш бола 13 никъ тоабе аьттув баьлар. Из хоам «Сердалога» бир цу оагӀонцарча министерствос. Эггара дукхагӀа къахьийга моттиг Наьсаре я. Ийс урам тоабеш, болх дӀабихьар цига. Дукха ха йоацаш, тоабаь баьлар 3,25 км кхоачаш бола Наьсар-Кертен яха урам.
Кердача хьала тӀа боалабаьб Наьсаре- МагӀалбик- Лохера Курп- Терек яха никъ. 4, 75 км кхоачаш керда никъ билла, гӀашлой никъ тоабеш, наькъашкара гӀармаш, керда лампаш йогӀаш болх дӀабихьаб цига. 5 км бола Заьзгакъонгий-Юрт - Махьмад-ХитӀе - Моздаке хотташ бола никъ эргабаьккхаб.
Иштта бола болх дӀабихьаб Магасера берий беш, ишкол йолча Чахкенаькъан, Базорканаькъан цӀераш лелаеча шин урам тӀа. Илдарха-ГӀалий тӀара Шолжах тилла тӀий тоадеш дикка къахьийгад болхлоша укх шера.
«2019-ча шера денз республике хьаяхьача «Кхераме доаца дика наькъаш» яхача проектага гӀолла 400 км совгӀа наькъаш тоадаьд (93 моттиг)», - белгалдир наькъий гӀулакхех йолча министерстве.
