Россе экономикан Министерствос Гӏалгӏайченна ахча лургда МСП хьаллаца
Карарча шера, Россе экономически дегӏаахара министерствос Гӏалгӏайчен ахча лургда паччахьалкхен оагӏорахьа зӏамига, юкъера бизнес хьаллоацаш. Юкъара дӏалаьрхӏача луш дола ахча да 319,4 миллион сом; цул совгӏа, керттера дукъ тӏадужаш хул федеральни центра, цо лу 256,9 миллион сом, моттигерча бюджетера да 62,6 миллион сом.
«Из ахча хьожадергда бизнес дегӏайоалаяра, цу юкъе предпринимателашта лаьрхӏа йола, балха майдаш, ахархой, иштта бизнеса паркаш, технопаркаш ӏалашъяра цхьацца аьттонаш а луш. Цо таро хулийт республике керда къахьегама, инновационни проекташ кхоачашъе.
Белгалде лов, иштта дӏахо дӏахьоргба зӏамига, юкъера бизнес дегӏайоалаяра болх, предпринимателий болх дикагӏа дӏабахьара дола хьалаш хьакхолларгда. Къаман проекташ кхоачашъеш хиларо таро лу республике хьалъе а кердаяха а лоархӏаме моттигаш, иштта экономически оагӏон болх дегӏабоалабе, цу юкъе МСП хьаллоацаш», - язду ший телеграм-оагӏон тӏа Гӏалгӏайчен кулгалхочо Келаматанаькъан Махьмуд-Ӏаьлас.
Зӏамига, юкъера бизнес дегӏайоалаяр ӏаткъаш да республикан экономиканна. Цо таро лу керда балха моттигаш хьакхолла, Гӏалгӏайчен инвестицей оагӏув лакхъе.
Республике, доалахьара хӏама хьадар дегӏадоаладара керттера терко лоаттаю. Паччахьалкхено новкъостал дара чудоагӏаш да ахчанца хьаллацар, республикан доалахьардар совдаккхар.
