Из хоам «Сердалога» бир цу моттигера.  Пригородни кхалерча Терек яхача моттиге ваьча Хаматханаькъан Батыра экономикахи бокъонехи йола институт яьккхар 2009-ча шера. 2012-ча шера наькъий гӀулакхех йолча ГУПа кулгал деш дӀаболабир цо ший къахьегама никъ.

ГУПа массайолча кхалешка наькъаш дехкаш, тоадеш йолча моттига кулгал деш хилар из 2013-ча шергара 2014-ча шерга кхаччалца. Кхо шу даьлча, «Ингушавтодор» яхача ГУ керте эттар из. 2022-ча шера денз, наькъий гӀулакхех йолча Министерствон хьалхалатташ ва Хаматханаькъан Батыр. Цу хана денз, ший болх лакхача боараме кхоачашбеш, хьайоагӀа из моттиг, къаьстта гуш ба «Кхераме доаца дика наькъаш» яхача къаман проектага гӀолла дӀабихьа боккха болх.