Ингалсий мехкара гӀалгӀай хьаллаьцар миннаца
БӀаьстан хьалхарча бетта 22-ча дийнахьа Манчестре гӀалгӀаша дӀаяхьа лерхӀача фольклорни мукъама фестивала лаьрхӀа тайп-тайпара хӀамаш яхьийтар Ингалсий мехка. Из хоам «Сердалога» бир миннаца болхлоша.
Белгалде деза, миннаца республикал арахьарча бахархошта санна, мехкал арахьа бахача вай къаман наха иштта гӀо лоаттаделга.
«Ингалсе йохьийтача хӀамашта юкъе я брелокаш, открыткаш, статуэткаш, магнит йоалла тайп-тайпара хӀамаш. Ингалсий меттала даьха гӀалгӀай иллеш аргда фестивале Кулеш Дарьяс ший тоабанца. Миннаца болхлоша из гӀулакх хьаллоацаш гӀо дарах, хоамий улгаш кечде, фестивале гулбеннача хьаьшашта тайп-тайпара дола вай къаман истореца, вахарца дувзаденна совгӀаташ дала аьттув баргба цига бахача гӀалгӀай», - дийцар тха газетага миннаце.
