«Селаӏад» берий журнал 40 дизарца даькъаладийцар Миннацо
«Селаӏад» яхача берий журнала 40 шу дизар. 1986-ча шера тов бетта 9-ча дийнахьа гӏалгӏай, нохчий меттала Шолжа-Гӏалий тӏа арадаьлар журнал эггара хьалха. Цун хьалхара редактор Чахкенаькъан Саӏид хилар. 1992-ча шера вай мехка дӏахобихьар журнало ший никъ. Арадаьннача 40 шера дукхача берий дог хьаьста, наьна метта хӏама лакхдаь журнал да ала деза цох тахан. Тахан цун 40 шу дизарца даькъалабийцар болхлой Миннацо.
«Журнала оагӏонаш тӏа арайийннай Боканаькъан Ахьмада, Ведажанаькъан Ахьмада, Чахкенаькъан Саӏида, Пхьилекъонгий Махьмад-Саӏида, Коазой ӏийсай, Хамхой Вахан, Хьоашаланаькъан ӏаьлий произведенеш. Журнала вахаре лоархӏаме дакъа дӏалоацаш, хьинаре къахьийгарех ва мехка цӏихеза хьехархо, йоазонхо ӏарчакханаькъан Сали, иштта йоазонхой Коазой Нурдин, Мерешканаькъан Султан, Хамхой Дауд, Оздой Фатима, кхыбараш а.
Тахан «Селаӏад» журнал «Сердало» кепайоазон Цӏагӏара арахецаш да. Юххьанца санна къаман метта хӏама тоадара, доаржадара тӏехьа доккха дакъа дӏалоацаш да журнал. Мехкарча Къаман библиотеке таьрахьий оагӏон тӏа яьхай 40 шера арадийннача журнала еррига номераш», - йоах Миннацо.
Массаза санна хьинаре, бехктокхаме дӏахо къахьега, шоай хӏама хӏара денна тоадеш хила даькъалабийцар Миннацо журнале къахьегараш. Гӏалгӏай мотт боаржабара тӏехьа йоккха моттиг дӏалоацаш, дукхача вай берий дегашта совгӏат хинна хьамсара долаш дахалгда журнал массаза санна! Наьна меттацара, ӏадаташцара, культурацара, Даьхенцара безам чӏоагӏбара тӏехьа боккха болх боаржабеш бола оагӏув ба ала деза цох тахан!
