Ӏалама Министерствос къайлагӀа дахча дохкар соцадир
05.11.2024 12:56
ГӀалгӀай Республикан хьун боахама Министерствон Шолжерча болхлоша гучадаьккхар, ДаьттагӀа яхача юрта, Мужечен хьуний доазонаш тӀа къайлагӀа даьккха дахча хилар, яхаш, дувц «Сердало» газетага Ӏалам лорадечар зарбан болх лелабераша.
Цига корадир 50 кубометр дахча, из а дикагӀа йолча хьун фух - къахььэстех, попа дахчах. Цу моттиге тӀабийхар Шолжа РОВД болхлой, из бокъонах доацаш даьккха дахча хьадаккхара болх дӀахьоргболаш.
«Хьадаьккха дахча ГӀалгӀайчен Ӏалама Министерстве чуйоагӀача урхаллене дӀахьоргда, цул тӀехьгӀа из дӀалургда ГӀалгӀай Республикан Росимуществон урхалленга», - аьлар экологаша.
