Хьалхара кхетаче дӏайихьар Магасе профсоюзий кагирхой оагӏоно
Гӏалгӏай республикан профсоюзий кагирхой оагӏоно Магасе укх шерара шbй хьалхара кхетаче дӏайихьар.
«Республикерча ОПП Союза хьалха латтача Оздой Хаде, кхетаче хьаеллаш, белгалдир республикан профсоюзни болама гӏулакх дикка чӏоагӏде, тоаде дезилга; иштта толамца шоай декхараш кхоачашдара тӏахьийхар цо доакъашхой. Вай мехкарча профсоюзни моттигашкара 15 доакъашхо вар кагирхой совета юкъе. Кулгал деш хургва Цӏолой Ислам, цун гӏончаш болаш къахьегаргда Беканаькъан Ахьмада, Бузуртанаькъан Амира, Гӏоандалой Ислама. Кагирхой совета секретаралла хержар Хьоашаланаькъан Хади», - йоах тхога бенача хоамо.
Совета берригача доакъашхоша, раьза болаш, тӏаийцар кагирхой балха юкъе хинна цхьацца хувцамаш, иштта укх шера шоай кхоачашде дезача декхарех дийцар цар. Цу юкъе да профсоюзни моттигаша лаьрхӏар кагирхошта довзийтар, къонача болхлой къахьегамах йола бокъонаш лораяра тӏахьожам лоаттабар, иштта ма хулла дукхагӏа кагирхой профсоюзашта юкъе чуозаш къахьегар.
Къаьстта йоккха терко еш дийцар маьцхали бетта 18-ча дийнахьа дӏаяхьа лерхӏача «Россе къона профсоюзни болхло - 2026» яхача Ерригача Россе яхьах, иштта укх бетта 26 - 27-ча деношка дӏахьоргйолча «Профсоюзаш, кагирхой Хӏирий мехка: истори, кердадараш» яхача кхетама хьал гойтача яхье кагирхой совета викалаша дакъа лацарах.
Цу оагӏонцарча балха юкъе эггара лоархӏамегӏа да, аьнна, белгалдир кагирхой профсоюзни балха юкъебоалабар, керда профсоюзни моттигаш хьаеллар, кхыча республикашкарча кагирхой совета доакъашхошца бувзаме болаш, пайданедараш дӏа-хьа эцар, иштта интернете, профсоюзни стендашка гӏолла хоамашцара болх боаржабар, дикка тоабар.
