Могашал эшаенна Москвера бахархой, Гӏалгӏайчен 3000 метр лакхача лоам тӏа баьлар
Москверча вахара ӏалашон, къахьегама Департамента «Нагатино Садовники» яхача цӏагӏара могашал эшаенна бархӏ спортсмен Гӏалгӏайчен Маьтлоам тӏа ваьлар, яхаш, хоам бу «Сердало» газетага ГӏР Кулгалхочун зарбан болх лелабераша.
«Доакъашхой 25 км бахар «Даьй никъ» яхача гӏашлой такилгах, цул тӏехьагӏа 3003 метр лакхача лоам тӏа баьлар. Тоаба накъайоаккхаш вар лакха говзал йола лоаман гид Гадаборшанаькъан Хайрудин, иштта Москверча «Нагатино Садовники» яхача социальни цӏен спорта даькъ тӏара говзанча Романов Никита», - аьлар хоамо.
Из дика гӏулакх дӏадахьара спортсменаш халонна духьалъотталуш, цхьоагӏо йолаш, лаьрхӏар чакхдаккхара тӏакхувш хила безар. Дӏа а юха а цу халача новкъа ваха везаш хилар 12 сахьата. Тӏехьара тӏа хинна хало яр шелал, дохк, кӏоаргга уллаш хинна лоа.
«Из вӏалла бицлургбоаца никъ бар. Кӏаьдвалар шин дийнахьа дӏадаргда, хӏаьта дагалоаттам даим бахаргба. Вай спортсменаша цӏаькха хьагойтар: лоӏам чӏоагӏа хилар, цо моллагӏа йола халонаш тӏехьаюташ хилар.
Лоам тӏа валаро иштта гойтар спортсмений шоайла барт, цхьоагӏо хилар, цар вӏаший новкъостал дора наькъа халача моттигашка кхаьчача», - аьлар Романов Никитас.
Цо дувцачох, лоаман лакхача моттигашка кхача дагахьа цар хьалххе а кийчо яь хиннаяр. Уж лоам тӏа балар чудоагӏаш дар «Са спортивни шахьар» яхача Спартакиадага кийчо яра. Из моттиг дӏахьош я хӏара шера. Москве маьтсела беттагара аьтинга беттага кхаччалца хулаш я из, цо вӏашагӏтох эзараш доакъашхой. Уж ба могашал эшаеннача наха лаьрхӏа йолча столицан вахара моттигашкара.
«Спартакиада дӏаяхьарга кийчо еш, цу тоабо лаьрхӏар Гӏалгӏайче яха. Цун йоккха таронаш я спортивни толамаш даха», - аьлар «Нагатино Садовники» цӏен кулгалхочо Молочников Владимира.
Цул совгӏа, царна дукха дайзар Гӏалгӏайчен культурах, исторех лаьца; цӏихезача Аьрзе, Аьга-Кхала гӏалаш яйра; уж хилар Цӏайлоама дукъ тӏа, Лаьжгера кхуркхолг болча. Боккхача безамца уж хьежар нах баьхача къаьнарча моттигашка, иштта чам баьккхар гӏалгӏай къаман даарех.
«Сага хьаде могаргдоацаш хӏама дац, нагахьа санна уллув ше хьаллаца саг а, ший низах тешар а хилча. Тхо раьза да унахцӏено яйнача наха из атта доаца декхар кхоачашде магарах», - аьлар Келаматанаькъан Махьмуд-Ӏаьлас, республикан туризмах дувцаш.
