Моцарта ашараш йийкар Магаса культуран дегӏаахара Центре
Магаса культуран дегӏаахара Центра фортепиано студе кулгал деш я цӏихеза композитор Малсаганаькъан Зарема. Цо дӏайихьар австрийски композитора Вольфганг Амадей Моцарта хетаяь ашарий сайре. Кхетачено вӏашагӏтехар къона ашархой, цар даьй-ноаной, иштта классически искусствон мах оттабе ховраш. Студе ӏомалучар таро хилар ше морг кхы воацача ашархочун кхоллама никъ, истори, вахар довза.
«Балха говзал лакха йолча хьехархочо, пианиста Малсаганаькъан Заремас лекхар Моцарта цӏихеза ашараш. Начӏал дола хьехамча яьнначул тӏехьагӏа, сцена тӏа арабаьлар цо ӏомабераш, цар шоай ашарашца гойтар кхыча цӏихезача композиторий кхолламаш. Хӏара бера таро хилар шийна карагӏдоалар гойта, иштта ашарашка гӏолла ший уйла йовзийта. Сайре хьалйизаяр дегай йӏовхалах, из бахьан долаш къонача ашархой таро хилар исбахьален оагӏув шоашта ма хетта дӏагойта», - аьлар «Сердало» газетага Магаса ЦКР.
Цу сайренах бокъонца йола исторе дийна урок хилар. Цо берашта кӏоаргагӏа йовзийтар классически тӏехьале, иштта фортепиано бовзача даькъе керда котало яккхара дегаш ураоттадир. Студе кулгалхочо Малсаганаькъан Заремас баркал аьлар массаболча доакъашхошта, дег чура из болх дӏабахьарах, лакха искусство езарах.
