Из хоам «Сердалога» бир къахьегама гӀулакхех йолча Министерствон зарбан болх лелабераша. Кердача, хозача куцаца хьаьший тӀаэцаш хургья; лоаман хозача моттиге уллаш йола «Аьрзи» яха лагерь. Лакхера кхоалагӀа гӀат тоаяьча, хьалхагӀа 350 бер хиннача лагере укх шера, бийсаш йоахаш, салоӀаш хургда 450 бер.

Белгалде деза, цига салоӀаш кхыча мехкашкара бераш хулаш долга. ХӀама дуа моттиг, бассейн, иштта кхыдараш чӀоагӀа хоза тоадаь латт. Ма дарра аьлча, таханарча хано дӀадеххача тайпара куц эргадаьккхад лагера. ХӀаьта цӀенача лоаман феца садоахаш, бӀарг ма кхоачча долча лоамашта юкъе салоӀаш хинна денош, берашта атта дицлургдарех дац.

Бийсаш йоахаш, бераш Ӏеш долча кхыча шин лагерера хьал а, дог Ӏаббалца сакъерда йиш хургйолаш, хоза меттадоаладаьд. Шоай аргӀанара болх лакхача боараме дӀабахьа кийчо еш ба ишколашкарча лагерешка а. Ахкан ха берий дегаш безамах, сакъердамах хьалдузаш йола ха я.