ИнгГУ филфаке ӏилманхой бицлуц, цар тӏехьале дегӏакхувл
Гӏалгӏай паччахьалкхен университете кхетаче хилар «Филологически факультета ӏилман дезал: хьехархой, хьехамчаш, боккхача ӏилманхоех бола дагалоаттам». Цу моттиго вӏашагӏтехар гӏалгӏай метта кафедра хьехархой, цо таро елар ноахала къамаьл де, ӏилман тӏехьале лорае.
«Хьехархоша гойтар цӏихезача ӏилманхой-хьехархой докладаш, цар вахаре дакъа лаьца хилар, ӏилма дегӏадоаладеш, иштта гӏалгӏай мотт ӏомабеш. Итташ шераш хьалха цар хьийхар, ӏилман ӏадаташ хӏанз а цар дешархошца долаш да, цар хьакхолл цахадаш ӏилман дешара «овла». Кхетаче чакхйоалаш, хьехархоша студенташта баркал аьлар, дика толамаш дахарах; шоаш хержача наькъ тӏа цар дӏаяхача ханашцара бувзам хотташ хиларах таханарча вахарца», - йоах «Сердало» газетага ИнгГУ зарбан болх лелабераша.
Из кхетаче къаьгга тешал деш яр, Гӏалгӏай паччахьалкхен университете филологически ӏилма дахаш а дегӏадоагӏаш а хилара, ӏадатий чӏоагӏача кӏийленца кердадараш хьакхоллаш. Цӏихезача ӏилманхой дагалоаттамо, лерхӏамо низ чуболийт къонача тохкамхошта, керда кхоллама балхаш хьакхолла.
