ГӏалгӀайчен гӀалай даькъ тӀа кхоъ гӀишло кораяьй
Укх деношка, Жӏайрахьа-Ахабоарзен музея-заповедника болхлоша шоай аргӀанара тохкама болх дӀахьош, ЛаьлагӀе яхача моттига гаьна йоацаш, йий ца ховш хинна кхоъ культурни тӀехьале - лаьттан кӀалхара кашамаш корадаьд, яхаш, дийцар «Сердало» газетага цигарча зарбан болх лелабераша.
ЛаьлагӀе ягӀа гӀалаш яьй, хетаргахьа, XVӀ бӀаьшере, из улл Чулхой (Салгахой) чӀоже. Цун доазон тӀа кхаь тӀема гӀалан, 22 нах баьхача гӀалан йиса лараш я. Цу даькъ тӀа кхоъ маьлхара каш а да.
Царех ши каш, Ӏо ца харцаш, диса хилар гуш да, бакъда кхоалагӀдар мел да ха таро яц, из геттара Ӏохарцарах.
Хьалхара каш 3х3 метр кӀийле йолаш да, кӀоаргал 1,5 метр, чувоалаш йола моттиг цаӀ я. ШоллагӀдар 3,5х3,5 метр, кӀоаргал 1метр, тхов бац. КхоалагӀа дола каш Ӏохаьрцад.
Уж кхо каш республикан культуран тӀехьален гӀишлошта чудоагӀаш хургда, Ӏилман болх дӀахьоргба цар тӀа. Из къаман истори довзара тӀакхувш болча наха эшаш да», - аьлар музее-заповеднике.
