Къаман библиотеке дӏаелар Кавказ тохкаш хиннача Чахкенаькъан Жабраила монографи
Гӏалгӏайчен Янданаькъан Жамалда цӏерагӏча Къаман библиотекан ганза тӏакхийтар ӏилма-тохкама йоазонаш. Мехка керттерча библиотеке дӏаелар цӏихезача ӏилманхочун, Кавказа тохкамхочун, тӏема историка, археолога Чахкенаькъан Жабраила монографи. Из яр «Герз, тӏема говзала дешаш, юкъерча бӏаьшерий тӏехьарча шерашка баьхача гӏалгӏай, нохчий (Xӏӏӏ–XVӏӏӏ)». Цу хоадам болча цхьан книжка тӏа да цо ше яздаь кулг а. Книжка библиотеканна дӏаделар Боазаркъанаькъан Бембулата, цун доалахьарча коллекце из лорадеш хиннад дукхача шерашка.
«Чахкенаькъан Жабраила ӏилма-технически къахьегам боккха мах болаш ба исторена, Xӏӏӏ-XVӏӏӏ бӏаьшерашка мехка этнографи, культура йовзара. Из книжка арадаьннад 2019 шера Магасе, архитектора - реставратора, «Керда проект» яхача компане кулгалхочо (Москва) Маларой М.М. хьаллоацаш. Ший балха юкъе цӏихезача ӏилманхочо дувц гӏалгӏай, нохчий Юкъерча бӏаьшерашка хиннача ханашкара тӏема истори.
Цу ханашка лаьтта тӏемаш мишта хиннад, малагӏча тӏема гӏирсашца ӏалашо яь хиннаб бӏухой, мишта лоралуш хиннаб, моастагӏа тӏавоагӏаш фу деш хиннад белгалду цу тӏа», - аьлар ГӏР НБ «Сердало» газетага.
Цу книжко ший моттиг дӏалоацаргья мехктохкама ганзе. Библиотекан кулгалхоша баркал аьлар Боазаркъанаькъан Бембулата цо иштта дакъа юкъедарах къаман культура лораеча.
