«Вахар ма дика да!» яхача телепередаче дийцар вай мехкарча цӏенача кхачах
ВДНХ дӏахьош хиннача «Россе чамаш» яхача йоккхача фестивала кхоачамах дувцаш, лаьрххӏа сюжет кийчйир «Вахар ма дика да!» яхача федеральни проекта кино доаккхарий тоабо. Хӏаьта вай мехкара цига дакъа лоацаш бар беркате, цӏена кхача хьабоаккхаш бола Хамченаькъан Хьамзат, Зурабанаькъан Мадина.
Вай республикера тайп-тайпара чаме даараш дӏадовзийташ хилар уж, дукха адам тӏагулденнача фестивале. Вай къаман стенд хоза хеташ, хьатӏаухаш бар нах. Мехкахоша Москве дихьадар геттара дика, дарбане лоархӏаш дола лекъа дулх, дашадехка цар фуаш. Къаьстта моттиг дӏалоацаш дар фестивале вай мехкарча беркатеча моттигашкара хьадаьккха модз.
Федеральни телевидене хьахьекхача сюжетага гӏолла, ВДНХ туристашта, москвичашта меттел боккхача мехка дахача миллионаш адама дайзар вай къаман даарцара ӏадаташ.
Итт дийнахьа лаьттача фестивале гулбеннабар Россе ерригача моттигашкара фермераш, цхьацца хӏама хьаеш бараш. 2 миллион совгӏа адам дар, цу цӏайна юкъе дакъа лоацаш.
