Эшалуш воаца Йовлой Мовсар котваьлар Мёрфи Леронал, Лондоне хиннача UFC яхье
Великобритане столице, цӏихезача «02 Арене» чакхъяьлар, UFC Латарий Бийсан 270 чӏоагӏагӏа болча спортсмений Йовлой Мовсара, Англе викала Лерон Мёрфе яхь.
Уж латаш хилар, пхе даькъа йийкъа хиннача хана. Йовлой Мовсара, латара техника дика лелаеш, боарам лорабара оагӏонаш хила езача беса йолаш, шийца яхьеваьнначул дикагӏа латаш ше хилар гойтар. Моттигерча наха хьаллоацаш хиннавале а, Лерон Мёрфена карагӏдаланзар российски спортсмен эшаве. Юххера, латара чаккхе еш, котало дӏаелар Гӏалгӏайчен спортсмена.
Ше котвалар хьакхайкадаьчул тӏехьагӏа вай спортсмена даькъалабийцар ше хьаллоацаш хиннараш, иштта аьлар организаце цӏи яккхара дӏахьош йолча яхьашка ше кийча хиларах. Говзанчаша лоархӏ, Мёрфегара цун «цӏагӏарча» доазон тӏа котало яккхаро Мовсарах керттера кандидат ву хьатӏайоагӏача хана тӏехкар даккхара.
Лерон Мёрфена ший мехка ше эшавар чӏоагӏа ӏаткъаш хилар, хӏаьта Йовлой Мовсар ММА дунен лакхаленаш йоахаш ва дӏахо а.
