Гӏалгӏайчен кердача спектакла мах хоадабир СКФО театрий кулгалхоша
Гӏалгӏайчен паччахьалкхен Эрсий ашарий-драматически театре хьежар «Гӏа е Зизашцара сурташ» яха Боазаркъанаькъан М.В. пьесах йола спектакль мишта оттаяьй. Цу тайпара репитици дӏахьош хиларо таро лу дувцаш дола хӏама дика довзарал совгӏа, кхелахошцара бувзам лелабе - хьаьшаша мах оттабу спектакла шоай оагӏорахьара, цар белгалду дегӏаахара керттердар, чӏоагӏа оагӏонаш йовзийт. Укх наькъа кхоллама балха мах оттабе баьхкар Даькъастен доккхагӏа долча театрай кулгалхой, цар шоай балха говзал йийкъар Гӏалгӏайчен болхлошца.
«Репитици дӏахьош, гулбелар Селий мехкарча паччахьалкхен гӏумкий А. Салаватова цӏерагӏча ашарий-драматически театра кулгалхо Тулпаров Скандарбек, Къилбаседа-Хӏирий паччахьалкхен Тхапсаев В. цӏерагӏча академически театра исбахьален кулгалхо Валиев Гиви, Гӏалгӏайчен берий театра кулгалхо Хазанаькъан Лейла, Черсий паччахьалкхен Аков М. цӏерагӏча драматически театра кулгалхо Емкуж Андзор, иштта Селий паччахьалкхен гӏумкий А. Салаватова цӏерагӏча ашарий-драматический театра кулгалхочун гӏонча. Хьежачул тӏехьагӏа хьаьшаша труппа цхьацца дола балха кердадараш могадир», - аьлар «Сердало» газетага Гӏалгӏайчен эрсий театре.
Гӏалгӏайчен эрсий ашарий драмтеатра кхоллама балха чудоагӏаш, театра болхлоша чаккхе йир «Гӏа е бесашца сурташ» яхача спектакла. Тулпаров Скандарбека яхачох, оттаяр белгга дола хьал чулоацаш я, бакъда режиссура кӏеззига хийцача дикагӏа хургья, цул совгӏа, гуш дола сурт чӏоагӏагӏа хилийтара сердал оттаярцара болх тоабе беза. Кхыболча доакъашхоша белгалду спектакль дика оттаяь хилар, юхь ловзаерий болх ший боарам тӏа вӏашагӏбеллаб, цунца нийслуш я ашара, дикораце оагӏув а.
Боазаркъанаькъан М.В. драматически пьесо чулоац цӏагӏара, мистически вахара хьал. Цу цатоамага гӏолла хьежаш вола саг кхоачаву дикадар, водар къоастадарга. Режиссёра Боазаркъанаькъан Микаила аьлар, из проект наха юкъе даьржача хьалах лаьца я.
Из спектакль гойтаргья Селий мехка ӏХ-ча Ерригроссийски «Эрсий сцена» яхача театрай фестивала чуйоагӏаш. Из го йиш я ардара бетта 12-ча дийнахьа Гӏумкий театре.
