Ши гӏат долча гӏишлон чу хургья керда мехктохкама музей
Укх шера хьалъе йолаергья Малсаганаькъан Тухана цӏи лелаеча Паччахьалкхен мехктохкама музея лаьрхӏа гӏишло. Из хоам «Сердалога» бера мехкадаь зарбан болх лелаберашкара. РФ Президента хьаллоацаш йолча культуран хӏама доаржадара проектага гӏолла, дӏахьош ба из болх.
«Вай мехкарча моттигаша тӏаозараш хӏара шера дукхагӏа хулаш латт. Шера 120 эзар совгӏа туристаш боагӏа вай мехка. Вай къаман ӏадаташ, культура, тамашийна хоза дола ӏалам довза безам бараш тайп-тайпарча дунен миӏингашкара ба. Керда музей вайна геттара чӏоагӏа эшаш я къаман истореца мел дувзаденнараш лораде, массанена дӏагойта», - белгалдир вай мехкадас Келаматанаькъан Махьмуд-ӏаьлас. Музея ганзе таханарча дийнахьа 15 эзар совгӏа исторецара хӏамаш я.
Уж я археологашта кораяь тайп-тайпара хӏамаш, къаьнара каьхаташ, вай даьша, ноаноша цӏагӏа леладаь цхьацца гӏирсаш, тӏема истореца дувзаденнараш. Шозза вӏаштӏаръяьча музее ма хетта из деррига доаржаде аьттув хургба вай. Таханарча ханага хьежжа хургйолча гӏишлон чу, музея кхоачамца мел эшар хургда.
Хӏамаш тоаеш йола пхьоалле, библиотека, 220 сага лаьрхӏа кхетачен зал, иштта кхыдараш а хургда цу чу. Яхьашцара болх чакхбаьнна баьлча хьалъе йолаергья гӏишло.
