Унахцӏенон бархӏ оагӏонца керда хувцамаш хургда мехка
2026-ча шера «Дӏаьха, паргӏата вахар» яхача къаман проектага гӏолла тайп-тайпара хувцамаш де лерхӏ вай мехка. Из хоам «Сердалога» бир унахцӏенон гӏулакхех йолча министерствос.
«Бархӏ моттиг чулоацаш хургья из проект: пхе оагӏонца эшаш дола ахча дӏахьожадаьд, кхаь оагӏонцара болх вӏашагӏболлача, болхлой хоржача проекташка гӏолла дӏахьоргба.
Укх шера унахцӏенон оагӏонцара хьал тоаде 421 миллион сом ахча дӏадохийтаргда, дукхагӏа дола рузкъа – федеральни оагӏонгара.
Поликлиникаш, дарбанчеш тоаеш, цига эшаш бола кхоачам эцаш, дега лазар долча, диабет, вирусни гепатит С дегӏаца дарий гӏулакха дӏадахийта лерхӏ из ахча», - йоах тхогарча хоамо. Иштта мехкарча дарбанчешка кизга увттаду гӏирсаш, МРТ, маммографаш эцаргья.
«Президента Путин Владимира чӏоагӏонца, йоаржаеш йолча къаман проекташка гӏолла, доккхий хувцамаш де аьттув боал мехка», - йоах тхогарча хоамо.
Къаьстта йоккха терко ю лораша диабет, гепатит С дегӏаца долча берашта, цар хьал ма хулла аттачахьа даккхара.
Лазараш ца даржийтара тӏехьа болх лоаттабаро, ханнахьа нахага хьожаш, уж чакхбоахаш хиларо, бахархошта аттагӏа хургдолча тайпара из дӏадахьаро унахцӏенон оагӏонца дувзаденнараш меттадоаладергда.
