Кхоллама керда наькъаш хьаделлаш я, Магасе тоаяь искусствай керттера моттиг
«Культура» яхача къаман проектага гӀолла, дӀадахача шера боккха болх дӀахьош куц тоадаьча Магасерча театран, кинон, иштта кхыдолча кхолламий балхех йолча моттиге ваха хилар вай Мехкада Келаматанаькъан Махьмуд-Ӏаьла. ХӀама Ӏомаде хьаухаш болча наха эшача тайпара, дика тоаяьй из моттиг. Къаьстта боккха теркам тӀабахийтар дешара программанна.
Таханарча хана цига дешаш волча 200 совгӀа дешархочоа мел эшар Ӏалашдаьд цига. ХӀара урока лаьрхӀа ше-ший классаш я - фортопеано, чӀондарг, иллиалархой, халхарий студеш, иштта кхоллама студи. Шоай мел дола начӀал цига гучадаккха, шаьрде аьттув ба берий, кагирхой. Иштта цига Ӏомаю видеош, сурташ дахара говзал, видеомонтаж, звукорежиссура. Тахан кхувш латтача кагирхошта боккха аьттув луш, дега гарга йола говзал шаьръе царна доккха гӀо деш я из моттиг. Къаман Ӏадаташцара кхоллама говзал санна, кхыдолча оагӀонашца дувзаденнараш а довза, Ӏомаде аьттув луш я Россе Президента соцам баь юкъеяьха къаман проекташ. Кагирхошта, берашта дега салоӀам хулийташ, тайп-тайпара керда наькъаш довзийташ, вай мехкара культура лакхъеш, кхоллама оагӀон хьал тоадеш, ба из болх.
