Укх шера ялх бетта баьча балхах дийцар Илдарха-Гӏалан Юкъарлен Кхело
Ер шу доладелча денз шоай кхоачашде аьттув баьннарех дувцаш, кхетаче дӏайихьар Илдарха-Гӏалий тӏарча Юкъарлен Кхело. «Сердалога» из хоам бир шахьара мэре.
Укх ялх бетта болх дӏахьош карагӏдаьннарех дувцарал совгӏа, дӏахойодача хана кхоачашде дезараш белгалдир цар. Юкъарлен Кхела хьалха латтача ӏалбаканаькъан Ювназа дийцар Промыслови оалача урамера тӏий тоадеш къахьегарах; шахьарерча моттигашка кулг тохаш, лостам барах; иштта 2027-ча шера шахьаре эггара хьалхарча юхьанца тоае еза моттигаш белгалъеча хоржамашка дакъа лацара бахархой тӏахьехарах.
Къаьстта йоккха терко еш дийцар гулбеннараша дешара моттигашка «Скулшутинг», «Колумбайн» яхача юхьмаччахьа долча оагӏонашка гӏолла даржача воча гӏулакхех, эскаре амал де кагирхой тӏахьехарах, хин, шахьарерча ӏама гонахьарча моттигашка лостам барах, ерригача Россе къахьегама шоатта доаржадеча дакъа лацарах. Иштта шахьарерча хьинардараша дакъа лаьцад вай къам, цхьаккха бехк боацаш, мехкахдаккхара, Коталон Денна, республика хьакхеллача Денна, Россе Денна хетаяьча кхетаченашка. Кхела доакъашхо юстара ӏанзар, Дербичанаькъан Хизар хиво ӏовихьача хана. Боккхагӏбараш цу оагӏонцарча балхах йолча штабе хилар, хӏаьта къонабараш хи чура кӏаьнк лохарашца бар.
