Кхаъ баларах бехк тӏатетта мехкара вахархо ӏаьдала кара ва
Хьакима кхаъ бала гӏийртача 48 шу даьннача мехкахочунна духьала гӏулакх хьадийллар республике. Россе Тохкама Комитета Шолжа кхален тохкама оагӏон викалаш ба из болх дӏахьораш. РФ УК 3-ча даькъа 291 ст. бехктокхаме озаш ва ӏаьдала бокъонаш телхаеш хиннар.
Тохкама болхлоша тахан белгалдечох, 2025-ча шера бехке лоархӏаш волча вахархочо Гӏажарий-Юртарча хьун боахамера гаьнаш тедарах ше бокъоно дӏадеххача тайпара бехктокхаме цаозар дезаш, 125 эзар сом ахча дӏатӏадахьийтад лакхе латтача болхлочун чота тӏа.
МВД УЭБиПК, Россе УФСБ болхлошкара кхаьчача каьхатех хьадийллад гӏулакх. «Сердалога» из хоам бера мехкарча Тохкама Комитетера. Карарча хана из гӏулакх дӏахо дикка тохкаш латт. Тохкама оагӏон болхлоша белгалдер хьаллоацаш, тахан ӏаьдала кара ва из.
