100 млн гаргга ахча да унахцӏенон хьал тоаде дӏадахийта лерхӏар
Унахцӏенон оагӏонца таьрахьашца дувзаденнарий болх тоабара тӏехьа федеральни моттигера дӏадахийта лерхӏар 99 млн сом ахча да. Из хоам «Сердалога» бир мехкадаь зарбан болх лелабераша. Цох оттаяьча чӏоагӏон кулг яздир РФ Паччахьалкхенна кулгал деча Мишустин Михаила.
«Унахцӏенон цаӏ йолча таьрахьашца дувзаденнарий платформа, ОМС оагӏон хоамий болх тоабара тӏехьа дӏадахийта лерхӏ из рузкъа, иштта дӏахохьоргба каьхаташцара электронни оагӏонцара болх, ИИ дувзаденнараш юкъелоацаш», - йоах тхогарча хоамо. Таханарча таьрахьашца дувзаденнарий оагӏонга гӏолла лор волча дӏаязбала, шоаш бахача моттиге лор хьавеха, рецепташ, больнични электронни мугӏаре хьаоттаде аьттув ба бахархой. Боккха аьттув луш да из гӏулакх лорашта а. «Онлайн оагӏонга гӏолла лор волча дӏаязвала эггара аттагӏа долча мехкашта юкъе яр вай республика.
Регистратуран болх аттачахьа баьннаб, бахархошта а паргӏатагӏа я. Масала хьакхеллача хьаькъалга (ИИ) гӏолла снимкашта анализ яккхар 40%-га кхоачаш ха кӏезигагӏа йоаяйташ да; цул совгӏа, дуккха дикагӏа а хул иштта баь болх. Лорашта а йоккха паргӏато еш хӏама да из», - белгалдир вай мехкадас Келаматанаькъан Махьмуд-ӏаьлас.
Республикан кулгалхочо теркалдир, хӏара дарбанчера болх таханарча кердадарашка гӏолла хьаоттабе безилга. Цу гӏулакха лаьрхӏа хьакъоастадаь дукха ахча да мехка. Белгалде деза, электронни оагӏонца лорага дӏаязвала аьттув болча итт моттига юкъе вай республика а хиннилга. Из мел йоккха паргӏато луш, дика доаржаде дезаш хӏама да дийцар Росздравтӏахьожама кулгалхо йолча Самойлова Аллас.
