Гӏалгӏайчен ОСФРа дезалашта луш дола ахча дӏаделар 8 эзар совгӏа сага
Гӏалгӏай Республике гӏолла йолча Россе Вахара ганза даькъо хӏара шера дезалашта луш дола ахча дӏаделар 8 эзар совгӏа болча республикан бахархошта, яхаш, дийцар «Сердало» газетага ОСФР зарбан болх лелабераша.
Шера цкъа луш дола ахча дӏадоладир аьтинга бетта 1-ча дийнахьа, из болх дӏахьоргба ардара беттага кхаччалца. Из ахча хьаэца йиш я Госуслугашка гӏолла е МФЦ ганза наха гӏулакх деча оагӏонга гӏолла. Пособи хьахьожадеш, Гӏалгӏай Республике гӏолла йолча СФР даькъерча болхлоша цкъа хьалхагӏа дӏалоархӏ цу дезалашта хьатӏабоагӏа пайда, цар доалахьардар. Хӏара сага хьатӏабоагӏаш бола пайда 1,5% лакхагӏа хила йиш яц моттиге оттабаьча маьхал. Лоацца аьлча, нагахьа санна 13% йоал луш хиннаяле, юхалуш дола ахча да 7%.
Из ахча хьаэца бокъо йолаш ба дукха пайда хьатӏабоагӏаш боаца даьй, нагахьа санна цар 18 шу даланза шиъ е дукхагӏа бераш дале, е 23 шу кхачанза очни деша вагӏаш дезалхо вале.
Дезалашта луш дола ахча хьаэцара 10 балха дийнахьа дехар тохкаш хила деза, цул тӏехьагӏа 5 ди далале из ахча хьадайта дезаш да. Ганза болх таьрахьашка баьккха хиларах пособеш дӏаденна доал сиха», - аьлар Гӏалгӏай Республике гӏолла йолча СФРа Оагӏон кулгалхочо Йовлой Зубейра.
