Гӏалгӏайчен Кулгалхочун стипенди хьожадарца дувзаденна дехараш чуэцаш да
2026-2027 дешара шера Гӏалгӏайчен Кулгалхочун стипендеш ийдара дехараш хьаэцаш бола болх дӏаболабаьб. Цу юкъе хила бокъо йолаш ба шоллагӏча е кхоалагӏча курсе, иштта кхы а лакхегӏарча курсашка дешаш бола Гӏалгӏайчен студенташ. Из программа лаьрхӏа я российски вузий студенташта, иштта Гӏалгӏайчен паччахьалкхен колледжий, техникумий студенташта. Керттера дӏадехараш - академически декхар цахилар, хьалхара ши сесси дика дӏаенна хилар.
Гӏалгӏайчен дешара, ӏилман Министерстве «Сердало» газетага ма аллара, каьхаташ хьаийду 2026 шера, ардара бетта 9-ча денгара 30-ча денга кхаччалца оршот, пӏаьраска деношка 15:00 даьлча денз 17:00 сахьат даллалца укх адресах: Наьсарен-Шахьар, Московскаи урам, 37, 3-гӏа гӏат, кабинет №6 (Гӏалгӏайчен дешара, ӏилман Министерство).
Цига лаьрххӏача операце бӏухой, цар дезалаш бокъо йолаш ба аргӏагӏа доацаш каьхаташ дӏадала, арахьа деша багӏараш шоаш тӏахила безаш бац. Царна болча аьттонна QR-кодага гӏолла шоаш хоам хьабайта йиш хургйолаш вӏашагӏделлад из гӏулакх. Цу тӏа хила деза тӏеххьарча шин семестрах долча цар дешара толамех дола хоамаш.
QR-кодага гӏолла хоам бе таро хургья 2026 шера ардара бетта 31-ча денга кхаччалца, бакъда из дар аьнна бӏарчча каьхаташ чудалара болх цу тӏа чакхбоалаш бац.
Гӏалгӏайчен паччахьалкхен университета студенташта кӏеззига кхыча тайпара да каьхаташ чудалара хьал. Уж хоржаргба вуза кулгалхоша шоаш, цудухьа каьхаташ цар дӏадохьийтаргда университета администраце.
Яхьа хьалаш дикагӏа довза таро я Гӏалгӏайчен дешара, ӏилман Министерствон сайта тӏа.
