Биъ седкъа болча хьаьшацӏено хозъергья Гӏалгӏайчен йоккха шахьар
Наьсаре дӏаболабир йоккха проект кхоачашъяра болх – биъ седкъа бола, гӏулакхера центр а йолаш, хьаьшацӏа хьалдар. Из хоам «Сердало» газетага бир ГӏР Кулгалхочун зарбан болх лелабераша.
«Из проект кхоачашъе лаьрхӏар Инвестицей кхел йолаш. Цига дӏадода ахча да юкъера лаьрхӏача 1,8 млрд сом. Из духхьал отель хьалъяр хинна ӏац, из да укх заман гӏулакх леладара йола туристически оагӏув хьакхоллар», - аьлар мехка Кулгалхочо Келаматанаькъан Махьмуд-Ӏаьлас.
Из доккха, сийрда, паргӏата цӏа да. Из хьалдергда Ахкан амфитеатр хиннача моттиге. Цу тайпара, из хьалдаро массайолча оагӏорахьара дегӏавара йола таронаш а хьакхолларгья.
Керда хьаьший цӏа лаьрхӏа да 120 сага, гӏулакхаш леладара центр, гойтама моттигаш, болх бу моттиг, СПА, ресторан, къаьста йола берий салоӏама моттиг. Из туристаш, бизнесменаш, тайп-тайпара говзанчаш, дукхача кхетачений доакъашхой вӏашагӏтохара ца хилча яргйоацаш я. Цул совгӏа, хургья балха моттигаш, из тахан лоархӏаме да вай республике.
«Къаьстта терко тӏайохийт аз инвесторашца дӏахьоча балха. Цу тайпара проекташ - моттигера экономика дегӏайоалаяра накъайоалаш я, цо хьакхолл керда балха моттигаш, йоал яккхара кӏийле. Аз тӏадиллад из болх лелабеча боахамашта, цхьаккха духьалтувсаш новкъарлонаш а йоацаш, из дош кхоачашдар.
Балха тӏахьожам лоаттабар чӏоагӏа хила деза: йилла ха, гӏишлон дикал, доазув тоадар, транспорт дӏакхоачаш хилар - из деррига лаьрхӏача беса хила деза», - аьлар Макшарипа Махьмуд-Ӏаьлас, цу балха лерхӏамах дувцаш.
2030 шера хоза, вай заман хьаьшацӏа болх бе долалургда.
