«Посылкаш лораяр» яха болх дӏаболабаьб, вай мехкарча почташка
«Посылкаш лораяр» яха болх дӏаболабаьб тахан, вай мехкарча почташка. Почтага гӏолла цхьацца хӏамаш дӏа-хьа кхухьийтача наха чӏоагӏа аьттув болаш, дика гӏулакх да из. Хӏанзчул тӏехьагӏа шоаш почте гӏолла дӏадохьийташ дола каьхат, посылкаш дагаяхка езац бахархой. Лертӏа а йолаш, дӏакхоачаргья уж шоай даьшка.
Хӏама дакхачар, дӏа ца эцаш йисачул тӏехьагӏа юхаяйтар а йоккха терко йолаш хургда, хьадувцачох. Цхьа моллагӏча бахьанах посылка кхаь денал дукхагӏа говш яле, е сага юхайоагӏе, Россе почтас дайнар меттаоттаду. Эггара лукхагӏа дола хьалуш дола ахча – 2000 сом. Цу юкъе да посылк дӏайохьийташ дайнар, юхаяйташ дӏадахар. Цу оагӏонца дувзаденнараш ма дарра довза почте дӏаваха веза.
«Россе Почтан, иштта моттигерча оагӏон кулгал деча сона а чӏоагӏа лоархӏаме хиннад бахархой гӏулакх боаггӏача боараме чакхдалийтар. «Посылкаш лораяр» яхача кердадарашка гӏолла кхы а дикагӏа тоабергба почтера болх», - дийцар вай мехкарча Федеральни почтови бувзама оагӏонна кулгал деча Гаьгенаькъан Ислама.
Россе Почта болх тоабарах болча оагӏон хьалха латтача Нечаев Антона белгалдечох, дӏайохьийташ йола посылкаш лораярал совгӏа, моллагӏа хӏама нийсденна болх хуле, дайнар меттаоттадеш гӏулакх да тахан юкъедаьккхар. Республике, иштта мехкал арахьарча моттигашка посылк дӏайохьийташ хӏанз кхера безаш хургбац нах.
Компане хьалхагӏа а юкъедаьккхадар наха атто еш дола кхыча оагӏонцара гӏулакх. 1-ча классах оттабаь мах болаш, дӏадохьийташ дола каьхат цхьан денал дукхагӏа говш дале, нийса ах мах из дӏадахьийтачунна меттаоттабу. Нагахьа шин денал дукхагӏа говш дале, беррига мах меттаоттабу (1000 эзар сомага кхоачаш).
