Юрташка хий чухьедар кхерам ба
ЧӀоагӀа догӀаш делхарах, МагӀалбика кхален Йоккхача-Ачалкхе, Аьккхий-Юрта хий чухьедар кхерам ба. Йоккхача Ачалкхера хий юхасецадеш дола сунт (дамба) хьалдаьд 2022 шера, из деха хилар бахьан долаш, цхьадолча доазонаш тӀа хий чудаьннад. Цу моттиге ваха хилар МагӀалбика кхален администраце кулгалхо Къоастой Ӏаддал-Хьамид, яхаш, дийцар цигарча зарбан болх лелабераша.
Кхален кулгалхочо къамаьл дир моттигерча бахархошца. Цар дийцар, эттача хьалах лаьца.
«РФ Паччахьалкхен Дума депутатаца Татренаькъан Муслимаца, цу юртарча нахаца, Йоккхача Ачалкхен кулгалхочунца ГӀогӀанаькъан Яхььяйца де дезараш таьхкар. Цар лаьрхӀар, цу доазон тӀа хий юхатохаш йола цхьаькха гӀишло хьалъе еза, аьнна, цо таро хулийтаргья хий кхычахьа гӀолла дӀадахийта. ДӀахойодача хана, хица дувзаденна хатар юхатохаргда цо», - аьлар Къоастой Ӏаддал-Хьамида.
Аьккхий-Юртара полици ха деш йолча моттиге хий чухьийдар. Болх дика вӀашагӀбелла хиларах, хий арадаккха таро хилар, башха зе доацаш дӀадерзадир из гӀулакх.
