Наьсарен 245 шу дизарга кийчо еш ба мехка
245 шу дизарга кийчо еш бола болх дӏахьош ба Наьсаре. Шахьара культуран Цӏен коа доккха концерт доаржадергда, цу цӏайна хетадаь. Цу деношка Малсаганаькъан Кӏарцхала цӏерах йолча парке шахьара исторе эггара хьалхара йоккха фестиваль дӏахьош хургба. Къаман даарех чам баккха, вай мехкарча говзача пхьараша хьаяьча хӏамашка хьожаш, ярмарке гӏолла гобаккха аьттув хургба мехкахой.
«Сердалога» шахьара администраце баьча хоамах, шахьара Ди дездарца доккхий хувцамаш деш болх дӏабихьа ши моттиг хьаелларгья – Малсаганаькъан Кӏарцхала цӏерах йола парк, шахьарера ӏам.
Нах салаӏа, паргӏатта ха дӏаяхьа гуллуш йола уж шаккха моттиг таханарча хано дӏадеххача тайпара тоаяьй. Карарча хана цӏайна кийчо еш хьувзаш ба шахьара моттигашка. Наьсарарче администраце лакха терко еш гӏулакх да из. Скверашка, урамашка цхьацца хувцамаш деш, цӏай тӏадоагӏилга хоалуш хургдолаш, къахьегаш хиннаб администраце. Къаьстта терко еш ба кхерамзленца дувзаденнарашта. Цхьаккха новкъарле, кхоачамбоацар доацаш дӏадаха дезаш да цӏай.
