Лагере салоӏаш долча берашта, шоай балхах дийцар мехка доазув лорадераша
«Къона патриот» яхача лагере салоӏаш долча берашца кхетаче дӏахьош хилар, мехкарча ФСБ Погранични оагӏон болхлой. Дукха хӏама довза аьттув хилар берий цу дийнахьа. Массазарча шоай декхарех, мехка хӏама лорадара тӏехьа кхоачашде дезарех дийцар берашка, иштта шоай балха тӏа атто еш дола гӏирсаш, кхыдараш довзийтар цар къонача тӏехьенна.
«Хӏара дийнахьа кхоачашде деза лоархӏаме декхараш довзийтар эпсараша берашта. 24 сахьата фийла хила безача наьха гӏирс миштаб, эггара чӏоагӏагӏа шоай балха тӏа цар теркалде дезараш малагӏаш да хайра берашта.
Лоархӏаме декхараш токхаш латтарий герзах кулг тоха, хьажа йиш хиларо геттара дог айдаь кхестар къонабараш», - йоах «Сердалога» «Къона патриот» яхача лагерера кхаьчача хоамо.
Дукха хаттараш хилар берий пограничникашка, хӏаьта вокхар, чӏоагӏа раьза болаш, цар хӏара хаттар даьшхар. Пограничника балхаца эггара чӏоагӏагӏа теркаме лаца дезараш малагӏаш да, тахан шоаш бӏарчча денош дӏахьош дола гӏулакх царна мел хьамсара да ха ловш бар къонабараш.
Белгалде деза, иштта йолча кхетаченаша берашта пайда белга. Пограничникаш яхача наха хьалхашка бехктокхаме хила безаш, доккхий декхараш латтилга кхетадир бераша. Ишттача кхетаченашка гӏолла чӏоагӏлу къонача тӏехьен Даьхенцара безам, шоай мехках доаккхал дар. Къонабарашта юкъера цхьаццабараш кхийна баьлча, Россе хӏама лорадара наькъ тӏа къахьега ловш, цу оагӏонцара болх харжа лаьрхӏе хул.
