Полице Эбарга-Юрта бахача наха дӏабийна кӏомал гучабаьккхар
Гӏалгӏайчен Шолжа кхале полице гучадаьккхар аргӏанара наркотикаш лелаяра зулам. Из дувзаденна дар моттигерча вахархочо дукха кӏомал а марихуана а лелаеш хилар.
«Наркотикаш лелаеш хиларах бола хоам кхаьчар Россе МВД «Сунженский» МО 2026 шера, кӏимарса бетта 28-ча дийнахьа. Полици яхар из бакъдий хьажа а, Эбарга-Юрта бахача наха чухьажа а. Гучадаьлар фусам-да шозза судо кхел яь хилар; 2017, 2019 шерашка наркотикаш лелаярах.
Тешаш а болаш, полици чухьежар цу фусама даькъ тӏа, царна корайир наркотикаш дӏаювш лелаю бӏарчча беш, кийча «продукци» лораю моттигаш. Нах чу ца бахача гӏишлон чу бар баьцаш чуйола кхо тӏормиг, хӏаьта беша - 14 доал деш лелаю кӏотарг, бокъабаь14 кӏомала цӏов, иштта эрий тӏайоалача наркотик йоаллача баьца 10 кӏотарг. Тхов тӏа лаьрххӏа йокъайолийташ ядаш, ший тайпара хьадж йоагӏа баьцаш яр», - аьлар «Сердало» газетага Гӏалгӏайче гӏолла йолча Россе МВД.
Республикерча МВД экспертно-криминалистически центро чӏоагӏду, еррига баьцаш марихуана (каннабис) хилар. Йокъаяьча наркотика цӏена дозал 38,61 грамм хилар.
Хьалаьцача сага духьала административни наркотикаш лелаярах лоткъам оттабир (1 д. 6.9 д. РФ КоАП). Цул совгӏа, лоткъам эцара даькъо уголовни гӏулакх хьадийллар, бокъонах доацаш наркотикаш дӏаювш лелаярах РФ УК 1 д. 228 ст. Цу сага духьалара гӏулакх дӏахо тохкаш да, из мехкара аравала бокъо йоацаш ва.
