Гӏалгӏайчен полице болхлой дакъа лоацаш ба, Россе къамий меттай Ди дездеча
Тахан вай белгалду Россе къамий меттай Ди. Цо дагадохийт вай культуран тӏехьален мах бараш, иштта хьалхадоаккх ӏадаташ лорадар, вай боккхача мехка дукха метташ хилар. Белгало йолаш да из ди, цӏихеза поэт Гамзатов Расул ваьча денца цхьана хилар. Цун кхоллам даим бар культурашта юкъера бувзам болаш, хӏаьта цун «Гӏарагӏураш» яха байт Россе массадолча къамий меттала хозаш я, миллионаш дола дегаш вӏашагӏтохаш.
«Сердало» газетага республикански МВД зарбан болх лелабераша ма аллара, Гӏалгӏайчен полице болхлоша дакъа лаьцар из цӏай дӏахьош, царна дагадехар Гамзатов Расула вӏалла а довргдоацаш дола мугӏараш.
Лаьрххӏача проекта чуйоагӏаш, «Гӏарагӏураш» яха байт дика йийшар боахама болхлоша Овшанаькъан Арсмака, Шишкина Анастасияс, Исмейланаькъан Рашида. Цар из ешача хана, хӏара мугӏ ший моттиге бужаш, меттацара культуран ӏадаташ цхьана хотташ хулар.
«Гӏарагӏураш» яха илли а байташ а дукхача хана денз вай исторически дагалоаттам болаш хьайоагӏаш я. Из ший тайпара дог тохадолийташ бола кхоллам хӏаране дег чу бужаш ба, цо хьалхадоаккх денал, майрал гойташ, машар гаргабоалабеш, дукхача бӏухоша шоай вахар дӏаденна хилар.
Гӏалгӏайче гӏолла йолча Россе МВД баркал оал из кхоллама проект оттаеш дакъа лоацаш хиннарашта: «Лоаман мукъамаш» яхача Кавказа халхара студена, къаьстта Меданаькъан Рамзана, Муцолганаькъан Мусайна, Къоастой Аминайна, Вешкаранаькъан Аьсета - цар иштта хоза хьал хьакхолларах. Иштта баркал оал Дзовранаькъан Ислама, гойтам дӏаязбеш новкъостал дарах, гӏалгӏай меттала исбахьален таржам дарах Ӏарапханаькъан Розайна. Из бахьан долаш, «Гӏарагӏураш» Гӏалгӏайчен лаьтта кхы а хьамсарагӏа, кхы гаргагӏа хилар.
