Гӏалгӏайчен полице тийшача балхах кредит ийца зуламхо техкар
Зулам леладерашца къовсам лоаттабеча Гӏалгӏайчен викалаша питам лелабер гучаваьккхар. Командировка дӏахьош, республикан МВД болхлошта гучадаьлар, къайлагӏа моттигерча вахархочун банка доалахьарча кабинета чу а ваьнна, къоал даьр малав. Цун аккаунт йоха а яь, наьха цӏерагӏа 300 эзар сом шийна кредит ийцад цо. Из уголовни гӏулакх тохкаш ба Магӏалбикера бокъонаш лораераш, 2025 шера ардара бетта денз.
«Полице шоай балха командировка дӏахьош, сихха лахара кхетаче дӏайихьар, цу тайпара царна гучадаьлар, хьалхагӏа (РФ УК 4 д. 159 ст.) суд яь хинна Санкт-Петербурге ваха 19 шу даьнна зуламхо из хилар.
Из тӏахьийхар лоткъам эцара. Цо дери дир из зулам ше даь хилара. Цо лохаш хиннай къаьнара, лелаеш йоаца мобильни номераш, уж ийеш хиннай цо, царна банк тӏачӏоагӏъяь хиларга сатувсаш, цунга гӏолла хьалха из лелаяьча сагах хоамаш лохаргдолаш.
Цу тайпара нийсделар, зе хинна саг Буряте болх бе вахача сим-карта эца дезаш, цунна тӏачӏоагӏйир банк, цу тӏа хьатӏаухаш хиннад цо болх барах доагӏа ахча. Гӏалгӏайче цӏавеначул тӏехьагӏа, цо из карта кхы ца леладеш дитар. Цхьа ха яьннача гӏолла из дехкад кхыча сагага. Банках хоамаш цу тӏа дисад. Из карта кхаьчар къонача зуламхочунга», - аьлар «Сердало» газетага Гӏалгӏайче гӏолла йолча МВД зарбан болх лелабераша.
300 эзар сом лочкъадаь моттиг нийсяларо вай цӏаькха а тӏахьех терконца хилара. Цо хьагойт зуламхой баьржа хилар - вай доалахьардар дӏадахьа уж кийча болга. Мобильни банкаца леладу гIулакх чӏоагӏа хила деза; из да паспорт, дӏоагӏаш, бохча санна лораде дезаш.
