Наьсарерча поликлинике дикагӀа дола лорий керда гӀирсаш кхаьчад
22.07.2025 14:49
УнахцӀенон оагӀонцара хьал тоадарах йолча къаман проектага гӀолла керда, дикагӀа дола гӀирсаш хьачукхухьаш латт вай мехкарча дарбанчешка. Наьсарерча поликлинике хьакхаьчай керда аппараташ. «Сердалога» из хоам бир УнахцӀенон министерствон болхлоша.
Дега лазараш, иштта дегӀацара кхыдола лазараш гучадоахаш йола УЗИ аппарат, физиотерапи дӀахьош эшаш йола аппарат, дегӀа лакхал дустараш, деррига хӀама ше хьахьокхаш дола тараз-гӀанд дегӀа могашал эшаеннача унахошка хьажар дикка аттача доаккхаш да.
«Кердача аппаратаца лазар хӀетта хьакхийттача хана гучадаккха аьттув ба, доаггӀаш дола дарба харжа а йиш я царга гӀолла», - дийцар тха газетага.
