Россе кердача моттигашкарча Гӏалгӏайчен викала Алчевске кхетаче хилар
Запорожски, Херсонски областашка, ЛНР, ДНР Гӏалгӏайчен викал Фаьрганаькъан Тӏахӏир Алчевскерча администрацена кулгал деча Гребенькова Светланайца кхетаче дӏахьош хилар. Вӏаший бувзам лоаттабеш дӏадахьа лерхӏача гӏулакхех дийцар цар.
«Магӏалбика, Лугански Къаман республикан Алчевск яхача шахьара юкъера хӏама чӏоагӏдарах дийцар кхетаче. Муниципальни моттигаша цхьана лоархӏаме гӏулакхаш кхоачашде лерхӏ. Керттердарашта юкъе да кагирхой политика, моттигашта доал дара болх тоабар, промышленность, бизнес, хӏама йохкар, эцар, иштта культуран, вахара оагӏонашцара болх. Гуманитарни оагӏонцара бувзам чӏоагӏбара дикка терко е лаьрхӏа ба хьакимаш. Алчевска, Магӏалбика бахархошта шоайла истори, культура, ӏадаташ довзийташ болх боаржабергба, аьнна, соцам бир», - дийцар «Сердалога» Фаьрганаькъан Тӏахӏира.
Россе кердача моттигий викало белгалдир цу балха юкъе бахархой, кагирхой моттигаш; культуран, дешара оагӏонаш чулоацаш къахьега лаьрхӏа хилар. Шин шахьарера гӏулакхаш довзийтаргда цу балхо Магӏалбикерча, Алчевскерча бахархошта. Нах шоайла вӏашкаозаш, бувзам чӏоагӏбеш, керда проекташ йоаржаеш гӏулакх хургда цох.
