ГӏалгӀайчен массазара викалаш бахар «Аьрзи» батальона СВО бӀухой болча
ЛаьрххӀа йола тӀема операци дӀахьош бола бӀухой хьаллацар; керттера декхар да ГӏалгӀайчен кулгалхой, юкъарлон балха. Укх деношка «Аьрзи» яха лоӀамхой батальон йолча бахар Краснодарски краера ГӏалгӀайчен викал Беканаькъан Ахьмадхан; Донецка, Луганска, иштта Херсонски, Запорожски областашкара викал Фаьрганаькъан ТӀахӀир.
«Уж цига баха хиларо цӀаькхаза а хьагойтар республика ший къонгий вахар дагадоаллаш хилар а, массайолча оагӀорахьара уж хьаллоацаш хилар а. Кхетаче дӀахьош, ГӏалгӀайчен викалаша къамаьл дир батальона хьакимашца, бӀухошца. Керттера терко тӀаяхийтар вахара хьалашта, бӀухой хьашташта. ОагӀонаша дийцар эшача хӏамай - технически Ӏалашо яра хаттараш, уж ца хилча даргдац хьалхашка оттадаь декхараш дика кхоачашдара», - аьлар «Сердало» газетага кхетачен доакъашхоша.
ГӏалгӀайчен викалаша баркал аьлар бӀухошта цар деналах, майралах, шоаш тӀаийца декхар цар дизза кхоачашдеш хиларах. Юххера а, цар «Аьрзи» батальона бӀухошта ловца баьккхар; уж могаш хилар а, котало яьккха маьрша цӀенах кхетар а ловш.
Шоай хьамсара ГӏалгӀайче даим шоашта тӀехьа латташ хиларо бӀухой денал чӀоагӀду. Тахан халкъа цхьоагӀо - из вай халонаш юхатохара йола кӀийле я.
