Спортах министра кулгалхочун гӏончанна тӏадиллад берашта юкъера спорт йоаржаяр
Спортах йолча министерствон кулгалхочун кердача гӏончанна тӏадиллад, берий - кагирхой спорт йоаржаяра тӏехьа къахьегар. Из хоам «Сердалога» бир министерствон зарбан болх лелабеча Гӏаппархой Аишас.
«Дешархошта, студенташта юкъе физически культура йоаржаяра тӏехьа дикка болх лоаттабе безаш ва Гӏайтакханаькъан Ислам. Берашта юкъе спорт чӏоагӏъе аьнна вай мехкадас Келаматанаькъан Махьмуд-ӏаьлас тӏадиллача декхарга гӏолла дӏабахьа безаш лоархӏаме болх ба из. Къаьстта терко е аьнна тӏадиллад мехкадас гаьнна ядача юрташта», - йоах тхога бенача хоамо.
Кхувш латтарашта юкъе спорт йоаржаяр мишта хила деза ховш вола «ЕЕРИГ ШОУ» яха проект хьакхелла Гӏайтакханаькъан Ислам цу моттиге хержар нийса лоархӏаш ва министерствонна хьалха латта Белхарой Руслан. Низ болашагӏа дола бераш хьахаржарах йолча моттигерча спартакиада программага гӏолла дӏайихьа кхетаченаш дикка пайда беш хилар, начӏал дола къона спортсменаш гучабахара тӏехьа.
