Россе МЧС гӏон дола дешарг гӏалгӏай меттала даьккхад
Психологически оагӏонца, иштта хьалхара лорий гӏо дарах бола лоархӏаме болх кийчбаьб Россе МЧС геттара сиха психологически гӏо дарах болча оагӏон болхлоша. Вай мехкахошта а болаш ба из болх тахан, гӏалгӏай меттала таржам даь.
Республикерча Россе МЧС Керттерча моттига хьаллоацаш, чакхдаьккха гӏулакх да из. Моллагӏа хатар ийккхача моттиге хӏара минот лоархӏаме я, хӏаьта гӏалгӏай меттала дола хӏама дикагӏа, сихагӏа дӏалоац наха. Хатар хинна маьженаш лозаяьрашта, дог сецарашта хьалхара гӏо дар, эттача хатара духьалъоттар мишта хила деза белгалду цу тӏа.
«Чӏоагӏа дика хет Россе МЧС пособи гӏалгӏай меттала довза йиш йолаш. Лоархӏаме дола хӏамаш дикагӏа, сихагӏа довзийт цу гӏулакхо. Таьрахьий оагӏонцара хьачудаккха, телефона тӏа хилийта, иштта каьхаташца хьаарадаьккха дӏа-хьа доаржаде йиш йолаш да из», - дийцар «Сердалога» Россе МЧС мехкарча лорий-психологически оагӏонцарча моттига кулгал деча Хьулахой Луизас.
Моллагӏа хатар хиннача моттиге новкъостал де ловш болча наха боккха аьттув ба ала йиш я цох. Лораш хьатӏакхачалехь, лозабаьрашта эггара хьалхарча оагӏонца де дезар кхоачашде ховш хургва из ӏомадаьр. Хӏаьта из моллагӏа хатар эттача моттиге чӏоагӏа лоархӏаме да. Россе дукха къамаш да, цунга хьежжа наьна меттала из даккхар чӏоагӏа атто еш да наха. Кхерамзлен хьалаца йоккха терко е езаш проект я из тахан.
