СЗФО мехкахошца кхетаче дӏайихьар Гӏалгӏайчен Москверча массазарча викала
Россе Президента Гӏалгӏайчен массазара викал волча Оздой Муслима шийца Кагирхой оагӏон кулгалхо, иштта кхыбола болхлой болаш; Гӏибухен-Малхбузен федеральни моттига Санкт-Петербургерча Гӏалгӏайчен викала нах тӏаийбеча кхетаче дӏайихьар. Кхетаче дакъа лоацаш бар СЗФО, Новгорода, иштта Архангельски областа массазара викалаш. Цига дийцар укх ах шера дӏабихьача балхах, иштта дӏахойодача хана, цхьана бувзам лелабеш, кхоачашде дезарех.
«Оздой Муслима доккха баркал оалаш, каьхаташ дӏаделар СЗФО, Новгорода викалашта, шоай декхараш дизза кхоачашдеш, болх бехктокхаме дӏахьош хиларах», - «Сердалога» из хоам бера Россе Президента Гӏалгӏайчен викала балха моттигера.
Оздой Муслим Санкт-Петербурге вахар иштта дувзаденна дар Кагирхой оагӏон доакъашхошца, СЗФО лакхерча дешара моттигашка деша багӏаш болча вай мехкарча студенташца кхетаче дӏаяхьа ловш хиларца. Кагирхой оагӏон кулгалхочо дийцар тахан шоаш йоаржаяьча проектех, иштта дӏахо кхоачашде лерхӏарех.
