Шоай болх кӏоаргагӏа ӏомабеш ба цӏи йоае, гӏо де оарцагӏъухараш
Шолжа-Шахьарерча МЧС колледже «Говзанчаш» яха чемпионат хилар. Из хоам «Сердалога» бера цу моттигера. Россе 28 моттигера тоабаш яр цига дакъа лоацаш.
«Лоархӏаме кхетаче хьаеллача баьхкабар мехкара Премьер-министр Сластенин Владимир,
РФ сенатор Илезанаькъан Микаил, вице-премьер Антонов Игорь, цӏаьхха нийсденнача хатарех моттигаш лораярах долча гӏулакхий министерствон кулгалхочун декхараш кхоачашдеш вола Йовлой Александр.
Иштта кхыбола хьакимаш а», - йоах тхога бенача хоамо.
Сластенин Владимира вай Мехкадаь цӏерах деча къамаьла юкъе аьлар, из чемпионат эггара халагӏа, лоархӏамегӏа дола декхараш кхоачашдара тӏехьа эшаш йолга.
Республикан паччахьалкхен кулгалхочо белгалдир, ишттача яхьашка кийчо ераш моллагӏча моттиге шоай гӏулакх лерттӏа дӏадахьа ховш бола, лакха говзал йола нах болга. Хатар эттача моттигашка геттара белгала хиннача хьехархошта, колледжа студенташта Лоархӏаме грамоташ елар цу чемпионате.
