ГӏалгӀайчен бахархой мехка Кулгалхочо даькъалабийцар, Йоккхача Коталон 80 шу дизарца
Боккхача тӀем тӀа Котало яьккха 80 шу дизарца ше кхайкарал деш, ГӏалгӀай Республикан кулгалхочо Келаматанаькъан Махьмуд-Ӏаьлас белгалдир из цӀай лоархӀаме хилар берригача мехка а, хӀара дезала а. Цо аьлар, Коталон Ди тӀом лаьттача шерашка гойтача денала, майрала, цхьоагӀон белгало хиларах. Из хоам «Сердало» газетага бир ГӏалгӀайчен Кулгалхочун, Паччахьалкхен зарбан болх лелабераша.
Мехкадас къаьстта белгалдир, дукхача къамех латтача советски халкъо, цаӀ санна цхьана этта, адамашта ца байна низ, Даьхенцара безам гойта хилар, тӀехьа тӀадоагӀача ноахала сийрда вахар хилийта гӀерташ. Цо белгалдир; Кавказ, Брестски гӀап, Москва, Сталинград мукъаяхарий, иштта Берлинага кхаччалца тӀом беш моастагӀчоа духьаллаьттарий, моастагӀа эшаваь хилара белгало - Коталон байракх ӀотӀаегӀарий денал.
Белгалдир, эзараш гӀалгӀай, вӀалла уйла ца еш, шоай Мохк бахьан эттар массайолча тӀема моттигашка. Тахан Макшарипа Мухьмад - Ӏаьлас яхачох, вай даьша леладаь майрал, денал гойташ дола гӀулакхаш масал да тахан, Украине дӀахьош йолча лаьрххӀача операце бӀухошта, цига цхьана этта, Россе кхерамзленна Ӏалашо еш, моастагӀчунца тӀом беш латтарашта.
Тӏеххьара, ший къамаьл чакхдоалаш, ГӏалгӀайчен Кулгалхочо тӀахьийхар, кортамукъале хилийтара шоай са Ӏодиллача ГӏалгӀайчен дикагӀа болча къонгашкара, мехкарашкара масал эцара. Цо иштта ловца баьккхар еррига Росси, республика машарца яхар, иштта Сийлахь-боккхача Даьймехка тӀема ветераний сий даим диц ца деш вай дегашка дахар ловш.
