Догӏаш латташ, хиш айдалара терко еш я мехкара Паччахьалкхе
Мехкарча Паччахьалкхен кулгал деча Сластенин Владимира тӏадиллад, ца соцаш догӏаш латташ хиш айдалара чӏоагӏа лакха терко еш хила, аьнна.
«Муниципалитеташта тӏадиллад кхераме долча хьала духьале яр чӏоагӏде, аьнна. Гӏомара галешца, кхыдолча, иштта хьал эттача увттадеш долча сунташца моттигаш чӏоагӏъяр а тӏадиллад. Цул совгӏа, хин моттигашта юхе бахача наьха ковнашка хьожаш хилар юкъедоаладаьд; цӏаьхха, хьал хувцаденна болх хуле, де дезар хьалхадаккха деза бахархошта. Из гӏулакх халача оагӏорахьа дерзе, арабаьха нах дӏачубига беза моттигаш кийчъяьй Илдарха-Гӏалий тӏа, Шолжа-Шахьаре, Жӏайрахьа, Шолжа кхалений моттигашка.
Хий чудаьннача моттигашкара арабаьхача наха бӏайха кхача, хий, иштта кхыбола кхоачам, юхе лораш хургболаш кийчо яьй. Наькъий гӏулакхех, ӏалама гӏулакхех йолча министерствон болхлой хиш дӏаухаш йола моттигаш, турбаш, каналаш цӏенде арабаьннаб хий дикагӏа дӏагӏоргдолаш. Хӏаьта кхерам лакхагӏа болча моттигашка 24 сахьата терко еш, моллагӏа хатар хуле, кийча болча болхлой тоабаш латт, цу гӏулакха эшаш болча кхоачам хьатӏаэза – мотопомпаш, экскаватораш, самосвалаш», - дийцар «Сердалога» мехкарча Паччахьалкхено.
МЧС болхлой ди, бийса ца къоастадеш, шоай болх чӏоагӏбаь ба. 24 сахьата хин моттигашта тӏахьожам лоаттабеш, хий айдалара боарам бусташ къахьег цар. Нах бахача моттигашта, цӏеношта хий дӏатӏакхача тарлуш хилар тахан мишта латт хьожаш ба уж. Беррига болх мехкарча Паччахьалкхенца бувзаме болаш, массадолча хувцамех эггара хьалха цига хоам беш дӏахьош ба.
Къаьстта йоккха терко еш ба тахан тӏаьшта, хин йистошта, бердашта, сунташта, хиш дӏаухаргдолаш къоастаяьча моттигашта. Хьал кхераме латтача моттигашкара тӏахьожам чӏоагӏбар да тахан лоархӏаме, хӏана аьлча цӏаьхха наькъаш дохадаь, сунтел хий дехьадаьнна хатар ийккхача, МЧС болхлой цу миноте кийча хила безаш ба.
МВД болхлой бувзаме болаш дӏахьош ба из болх. Наькъашкара хьал лорадеш латтача полице болхлоша нах кхераме долча наькъашка гӏолла дӏаухаргбоацаш терко ю тахан. МЧС, ӏаьдала, паччахьалкхен болхлоша вӏаший бувзам болаш болх тахан цхьана дӏахьош хиларах, массадолча хӏаман терко е, тӏахьожам бе аьттув боал.
