Гӏалгӏайчен бокъонаш лораераша кхел йир лоалахарча республикан вахархочоа
Гӏалгӏай Республикан Шолжа кхален судо чӏоагӏдир лоалахарча мехкара вахархо бехке хилар, ший декхараш кхоачашдеш волча ӏаьдала болхлочун цо низ тӏабахьарах.
Тохкамхоша яхачох, 2026 шера маьтсела бетта 3-ча дийнахьа, Шолжа кхале «Кавказ» оалача федеральни машиний наькъ тӏа, Гӏалгӏай Республике гӏолла йолча МВД ГИБДД ДПС ОБ инспектора каьхаташка хьажа соцайир «Lada Granta 219170» автомобиль; из соцаяра бахьан дар водитель кхерамзлен тӏехкар дӏатеха цахилар.
Автомобила дас дехар дир полице болхлочунга; административни бокъо толхаяь хилара материал ма оттае, аьнна. Бакъда ӏаьдала болхлочо хьалхадаьккхар цун административни бокъонаш толхае йиш йоацилга, иштта духьале ца еш ӏаьдало яхар де дезилга. Законо дӏадехар кхоачашде раьза воацача цу сага полице болхлочун юхьмараш тӏа корта техар.
Цун зӏамига кхо бер хилар дӏа а лоархӏаш, кхаь шера цун оамал зувргйолаш, ха техар судо зуламхочунна.
