Хоржамий хьалхарча дийнахьа, кхадж тоссаш хилар мехкарча Парламента кулгалхо
Паччахьалкхен Думан, мехка Халкъа Гуллама хоржамашка дакъа лоацаш, ший декхар кхоачашдеш вар республикан Парламента хьалха латта Тӏумхой Мухьмад. Наьсар–Кертерча № 609 йолча хоржамий моттиге тессар цо кхадж хьалхарча дийнахьа. Журналисташца къамаьл деш, цо белгалдир, хоржамашка хьавар хӏаране лоархӏаме декхар долга.
«Даьхенцарча бувзамо, лерхӏамо чӏоагӏбу вайна юкъера безам. Хоржамаш республикан вахаре лоархӏаме долга кхетаде деза вай массане. Дӏахо, пхе шера вай мехкара гӏулакхаш таханарча хоржамга хьежжа хургда. Вай мохк низах чӏоагӏбенна, хӏара денна хӏама тоалуш, лакхлуш хила беза! Берригаш арабаьнна, шоай декхар кхоачашдара тӏахьех аз тахан», - белгалдир Тӏумхой Мухьмада, «Сердало» газета интервью луш.
Белгалде деза, хьалхарча дийнахьа кхадж тасса дукха нах арабаьнна хиннилга. ӏуйран денз, хьаухаш да адам шо-шоай моттиге. Карарча хана хоржама моттигашкара хьал боаггӏача боараме, цхьаккха кхоачамбоацар доацаш да.
