Ерригача Россе кхетаче дакъа лоацаш хилар РДНТ доакъашхой
Культуран оагӏонцара тӏехьале лораярах йолча Ерригача Россе кхетаче дакъа лоацаш хилар, вай мехкарча къаман кхоллама Цӏен болхлой. Цу моттига кулгалхочун гӏонча Котанаькъан Марем, исбахьален оагӏонцарча балха хьалха латта Абдурзаканаькъан Аьсет, этнографех болча оагӏон хьалха латта Хутенаькъан Тамила бар Россе къамий меттай Ден хетаяьча кхетаче дакъа лоацаш хиннараш. Российски Паччахьалкхен къаман кхоллама Цӏа дар из болх дӏатӏаийцар. Боккхача мехкара культуран оагӏонцара хӏама тоадара тӏехьа къахьегараш гуллуш моттиг хилар цох. ГРДНТ кулгалхочун хьалхара гӏонча вар программа хьайийллар. Паччахьалкхен оагӏонцара гӏо дарах, РФ этнокультуран оагӏонцара хӏама лорадара бокъонах дийцар цо.
«Фольклора цаӏ дола ди» яхар санна йола федеральни проекташ лоархӏаме йолга, тахан цу оагӏонцарча Федеральни реестре 112 моттиг чӏоагӏъяьлгах - дийцар цо. Цул совгӏа, цхьацца кхоачамбоацарех а дийцар цо. 26 къаман метташ тахка, шаьрде йиш йолаш кийчо яьй тахан мехка, бакъда дешара пособеш царна юкъерча ворхӏнех мара дац карарча хана, цул совгӏа, хьехархой цатаар а да», - дийцар «Сердалога» Котанаькъан Марема.
Россе къамий культурай Оагӏон керттера болхло йолча Барахова Татьянас кхетаче дийцар «Гӏибухерча миха мукъам» яхача фестивалах, иштта финно-угорски, самодийски фаьлгий арт-книжках, этнонаькъаш хьакхоллара балхах. Эрзянски, удмуртски меттала йола йолча кхоллама номерех оттаяь «Бӏаргадайча довза къаман тӏехьален йоазош» яха проект йовзийтар Калужски ДНТиК кулгалхо йолча Ленц Ольгас. «Говрилгах-горбунеках долча фаьлгашта» Россе къамий метташка доахаш таржамаш дарах йола проект, болалуш болча авторашта лаьрхӏа «Меттах йола арт-резиденци» яха кагирхой программа йовзийтар цига.Цу кхетаче дакъа лацаро дикка пайда бир ала йиш я вай мехкарча болхлошта, хӏана аьлча дукха хӏама хьаэца йиш йолаш моттиг яр из.
