Инарал-майор волча Кулик Александраца кхетаче дӏайихьар вай мехкарча премьер-министра
Моттигерча Паччахьалкхен хьалха латтача Сластенин Владимира кхетаче дӏайихьар Къулбехьерча тӏема оагӏон моттига кулгал деча инспекторий тоабан инспектор, инарал-майор волча Кулик Александраца, Волгоградски областе массазара Гӏалгӏайчен викал волча Мержой Гириханаца.
«Кхетаче дийцар къонабарий дегашка Даьхенцара безам, лерхӏам чӏоагӏбарах, респуликашта юкъерча бувзамех, истори лорадарах, доаржадарах», - аьлар «Сердалога» республикерча Кабмине. Иштта цига дийцар юкъарча моттигашца бувзаме болаш, цхьацца болх дӏабахьарах, Даьхенцарча безамах йола проекташ йоаржаяра тӏехьа къахьегарах, вай республикан, Волгоградски областа юкъера бувзам чӏоагӏбарах. Кулик Александра дийцар тахан къонача тӏехьенца из деррига чулоацаш лоаттабеча балхах, «Къона эскар» яхача оагӏон гӏулакхех, цун толамех.
Мержой Гирихана дийцар Волгоградски областе бахаш болча гӏалгӏай оагӏув хьаллацарах, иштта йоаржаеча юкъарча, гӏо деча проектех. «Тахан къаьстта лоархӏаме да Даьхенцара лерхӏам, безам чӏоагӏбеш йола проекташ хьаллацар, уж йоаржаяра тӏехьа гӏо дар, хӏана аьлча ший Даьхе езар цун кхоанарча вахарах дог лазаш хилар да. Из болх дӏахьош болча наха новкъостал лоаттаде, оагӏув хьаллаца беза», - белгалдир Сластенин Владимира цу дийнахьа хиннача кхетаченах дувцаш.
