Гӏалгӏайчен премьер-министра паспорташ дӏаделар республикан къонача бахархошта
ГӏР Паччахьалкхен Председатела Сластенин Владимира укх деношка лаьрххӏа кхетаче дӏахьош дакъа лаьцар, Россе Ди долаш паспорташ дӏалуш дар къонача бахархошта, яхаш, дийцар «Сердало» газетага республикан министрий кабинета зарбан болх лелабераша.
«Кхетаче дӏайихьар аьтинга бетта 12-ча дийнахьа – паччахьалкхен керттера цӏай долаш, цо белгалду вай мехка дукхача бӏаьшерий истори, низ, цхьоагӏо хилар. Кхетаче дӏахьош яр ГӏР МВД нах баха дӏа-юха ахара хаттарех йолча урхаллене.
Цу кхетаченна чудоагӏаш, республикан къонача бахархошта Российски Федераце паспорташ дӏаделар. Моаршал хоатташ, дош аьлар Сластенин Владимира, ГӏР гӏолла йолча чурча гӏулакхий министра, полице инарал-майора Котов Владимира», - аьлар хоамо.
Дег тӏара даькъалабийцар къона бахархой цу денца, паспорт хьаэцаш дола ди белггала хилар гуш дар, цо царна хьалхашка хьабелларгба дӏахо цар хургбола вахара никъ. Из я саг воккха хилар хьахайташ йола белгало, цо тӏахьех моллагӏча хана ший Даьхен накъавоалаш хилара.
