УПЧ гӏо дарца, ший цӏен гаргагӏа йолча набахта хьавоалавир тутмакх
Ший дезала новкъостал де, аьнна, дехар дир сага бокъонех вола викал волча енача кхалсага. Астрахански областе лаьца воаллача воӏа тӏехьааха хала дар, цӏен цхьацца бахьанех.
«Ший бала лоткъабе енача кхалсага дийцачох, хала яр цар таро, цхьа бер заӏапхо хиларах массахана тӏахьожам эшаш дар. Гаьнарча моттиге лаьца воаллача воӏа тӏехьааха аьттув балац цун, могаш доацаш бер хиларах, ахчанцара хьал а дика цахиларах. Чӏоагӏа дехар дир цо юхе йолча – Нохчий мехкарча набахта хьавоалаве ший воӏ, аьнна», - дийцар «Сердалога УПЧ.
Сага бокъонех вола викал оарцагӏваьлар, цу кхалсага хьал аттачахьа даккха. Таханарча дийнахьа Россе УФСИН Нохчий мехкарча набахта ха токхаш ва цун воӏ, цо дийхача тайпара. Халача хьале болча дезала чӏоагӏа аьттув болаш гӏулакх да из.
