«Дошо Трезини» яхача яхьашка котало яьккхар Хьарп меттаоттаяра проекто
«Дошо Трезини-2024» яхача VӀӀ-ча халкъашта юкъерча яхьашка котало яьккхар Хьарп яха гӀалай моттиг тоаяьча проекто. Из хоам «Сердалога» бир ЖӀайрахьарча музея болхлоша.
Дерригача дунен тӀара архитектура лоархӀараш, цун хам ховраш гулбир хӀара шера дӀакхухьача яхьаша. 34 мехкара нах бар тӀахьожама тоабан юкъе хиннараш. ХӀама тоадеш, кердача куца тӀа доаладеш, къахьийгача эггара толашагӀа йолча проекта кхоач «Дошо Трезини» яха халкъашта юкъера преми. Музея ганзе хьачукхаьче, хӀара шера хулача «Архитектура –кхоллам санна» яхача гойтаме хьокха оттаду белгалбаьннарий балхаш. Укх шера из преми кхаьчар лоаман Хьарп меттаоттаеш проект вӀашагӀъеллача «АСМ группанна».
«Тайп-тайпарча мехкашкара гулбеннача доакъашхошта юкъера барт, бувзам чӀоагӀбара тӀехьа да тхо. Цу гӀулакхо массахана диканга сатувса, керда толамаш даха, вӀаший дог лазаш хила низ лургба вайна», - аьлар яхьаш дӀахьош хиннараша.
