Гидашта ховр массахана тохкаш хургда мехка
Мехкарча керттерча туристически наькъашка болх дӏахьош болча экскурсоводий кийчон болх малагӏча боараме ба тохкаш хилар культурах, туризмах йолча министерствон болхлой. Къаьстта терко йир укх наькъа Жӏайрахьа кхален моттигашта. Хӏара денна итташ экскурсе уха тоабаш латташ моттигаш я уж. Паччахьалкхен «аттестаци» йоацаш болх беш бола гидаш гучабахара тӏехьа дӏахьош дар из гӏулакх. «Сердалога» из хоам кхаьчар цу оагӏонцарча министерствера.
Тха газетага дийцачох, цу оагӏонцара хӏама бокъонга хьежжа хилийта дезарал совгӏа, туризма гӏулакх тоадеш, шоай болх лерттӏа ховш боацарех туризм лораеш да из. Республике ухаш болча хьаьшашца, туристашца болх беш бола гидаш хӏара моттига истори довзаш, боаггӏача боараме деррига дӏадахьа ховш хила беза.
Министерстве белгалдечох, еррига тоабаш лицензи енна болхлой болаш, каьхаташ долаш яр. Культурах, туризмах йолча министерстве теркалдечох; турбизнесе къахьегарий экскурсионни болх лелабе бокъо яц, цу гӏулакха кийчо ярах дола аттестат доацаш. Каст-каста рейдаш дӏакхахьа арабувл тахан, из гӏулакх меттадоаладе гӏерташ. Республикерча массадолча туристий наькъашка, моттигашка хьалхабаьнна лелараш цу оагӏонца дувзаденнараш дика довзаш, лакхача боараме кийчо яь хила беза.
