Пилотни проекташ йоаржаяр дикка пайда беш хилар вай мехка
РФ СКФО массазара викал волча Чайка Юре дӏахьоча кхетаче дакъа лоацаш хилар вай мехкада Келаматанаькъан Махьмуд-ӏаьла. Из хоам «Сердалога» бера Мехкадаь зарбан болх лелаберашкара. Къилбаседа Кавказерча, вай мехкарча доагора-энергетически моттигех дийцар кхетаче.
«Къаьстта йоккха терко еш дийцар ток боаггӏача боараме йоаярах, иштта цу оагӏонцарча декхарех болча балхах. Бахархой токацара кхоачамбоацараш юстардаха деза.
Иштта тока, ЖКХ оагӏонашцара болх СКФО кхаь моттиге мишта латт хьоахадир кхетаче, вай мохк а бар цу юкъе», - белгалдир вай Мехкадас. Республикан кулгалхочо теркалдир, пилотни проект йоаржаеча юкъе мехка газ, хий, ток кӏезигагӏа йоаелга; иштта цхьацца дикка пайда беш дола хувцамаш а юкъедоаладаьд.
Мехкадас бахархой тӏахьех ток, газ, хий зехьа цадоадара, боаггӏача боараме из гӏулакх лорадара. Вай массане терко е езаш хӏама да из. СКФО доагора-энергетически оагӏонца кхоачашде дезарах, цу оагӏонцарча моттигашта лакха тӏахьожам лоаттабарах дийцар цига.
